பிள்ளைகளுக்கு காய்ச்சல்

கடும் குளிரினூடே
ஒருவித வெம்மையின்
தாக்கத்தை வீடெங்கும்
உணர முடிகிறது...

எப்போதும் வருகை தந்து விடும்
டோராவும் சோட்டா பீமும்
தொலைக்காட்சிப் பெட்டிக்குள்ளேயே
அடைபட்டிருக்கிறார்கள்...

டெடிபேர் பொம்மைகளும்
கார் பொம்மைகளும்
ஸ்பரிசச் சூடு கிடைக்காமல்
முடங்கிக் கிடைக்கின்றன...

மாலை நேரங்களில்
கூட்டி எடுக்கையில்
நிரம்ப வரும் குப்பையோ
வெகுவாகக் குறைந்திருக்கிறது...

கொஞ்சல்களும் குறும்புகளும்
எதிரொலித்த சுவர்களின் மேல்
இருமலும் முனகலும்
தங்கள் ஆதிக்கத்தை
தொடுக்கின்றன....

மொத்தத்தில் பிள்ளைகளின்
அன்றாடங்களை குலைத்து
கொடும் அமைதியான நேரங்களைக்
கொடுத்துக் கொண்டிருக்கிறது
அவர்களைப் பிடித்திருக்கும்
பொல்லாக் காய்ச்சல்...