சுவரொட்டி

எப்போதும் சிடுசிடுப்புடன்
சிரிக்க மறந்த நடத்துனரின்
முகத்தை சற்றும் மாற்றமில்லாமல் 
பிரதிபலிக்கிறது
சாலையின் தடுப்பில் ஒட்டப்பட்டிருக்கும்
கண்ணீர் அஞ்சலி சுவரொட்டி...!

முகம் முழுக்க மஞ்சளுடன்
ஒரு ரூபாய் நாணய அளவுக்கு
குங்குமத்தை திலகமாக
இட்டபடி காட்சியளிக்கும்
தோழியின் தாய் சுமங்கலியாகவே
சென்றடைந்ததை பறை சாற்றுகிறது
மளிகைக்கடையின் அருகில்
ஒட்டப்பட்டிருக்கும் சுவரொட்டி....!

நேரில் பார்த்தால் சிரித்தபடி
கடந்து செல்லும் அளவுக்குண்டான
சிநேகம் கொண்டிருந்த ஒப்பந்ததாரரின்
இளவயது மரணத்தை சுட்டிக்காட்டுகிறது
ஆரம்பப்பள்ளி மதில் சுவரில்
ஒட்டப்பட்டிருக்கும் சுவரொட்டி..!

வளர்ந்த இடம் விட்டு தூரம் இருந்தாலும்
எனக்கும் பிறந்த வீட்டினருக்கும்
அறிந்தவர்களின் சுக துக்க செய்திகள்
எங்களின் நல விசாரிப்புகளுடனே
பகிரப்பட்டு விடுகின்றன...!

நான் அறிந்து என் வீட்டார்
அறியாதவர்களின்
சுக செய்திகள் என் காதுக்கு
எட்டாமல் போனாலும்
அவர்களின் மறைவு செய்தியை
ஒவ்வொரு முறை
பிறந்தக விஜயத்தின்போதும்
தவறாது தெரியப்படுத்தி விடுகின்றன
சுவரொட்டிகள்.....!!!!